近年足球鞋界出現咗唔少轉變，唔少品牌開始放棄袋鼠皮，改用人造皮革。Adidas 於前幾代嘅 Copa 系列已經開始使用牛皮製作佢哋嘅 Fusionskin，成效其實都唔錯； Nike 嘅 Tiempo 10 就係另一個例子，已經全面轉用人造物料，配合環保潮流。Puma 亦都有動作，佢哋嘅傳奇 King 系列棄用袋鼠皮，轉用人造物料。呢堆改變之外，都好明顯地見到越黎越多波友轉會仲有出袋鼠皮嘅 Mizuno 系列 （當然仲有 Joma、Kelme 等中國製為主嘅牌子）。
根據外國報導，Mizuno 亦有計劃逐步淘汰袋鼠皮。報道嘅背景係有個動物權益組織去信 Mizuno，要求呢個日本牌子停用袋鼠皮。Mizuno 發言人指出，佢哋了解到使用袋鼠皮嘅隱憂，指出佢哋會開始計劃逐步淘汰袋鼠皮 (a gradual phase-out of Kangaroo leather)。不過，佢哋都提到袋鼠皮嘅柔軟度、輕身同貼腳感仍然好受球員歡迎，所以即使有呢個方向，具體轉變時間暫時未確定。始終 Mizuno 一直係用袋鼠皮最多嘅品牌之一，特別對亞洲人嚟講，佢哋嘅轉型將會受到多關注。
我哋收到消息，就係 2026 年春夏系列嘅鞋款仍然會用袋鼠皮，不過最終都要等官方公佈先至實錘，唔排除有變數。所以而家唔使太擔心，但同時亦都需要開始珍惜呢啲高質袋鼠皮球鞋。喺全球趨勢影響下，呢種經典物料可能真係慢慢退場。
Source: Fashion Dive – Mizuno to phase out kangaroo leather (Published on 3/6/2025)
