一方面對觸感讚不絕口，但另一方面，唔少波友都有投訴淺色系 Mercurial Vapor 16 著一排就好易污糟。無錯足球鞋係消耗品，而就算外觀污糟咗都係無穿無爛一路仲著得，但係咪真事？繼續我哋嘅認真精神同大家討論一下：
❶ Gripknit 點解啜？
Gripknit 係 Nike 研發嘅一種高性能織物，同附帶嘅TPU塗層。要令到對足球鞋可以對個波提供磨擦力，現時鞋廠有兩個辦法。
第一係從鞋面紋理嘅形狀著手，最大例子就係 Puma Ultra 同 Nike Mercurial Vapor 14 嘅網格狀鞋面，一格一格凸出嘅位置，磨擦個波時就更有力水（可以幻想下，你用個BBQ網，或者用塊表面好滑嘅紙皮去磨擦個波，邊個較大機會令到個波轉）。
第二，亦都係 Nike Gripknit 鞋款技術現時大致嘅理念，就係以塗層技術加強黏性（可以幻想下，今次塊紙皮上面有晒膠水，係咪仲勁過BBQ網呢）。塗層除咗啜啲之外，亦都唔會增加鞋面重量，底下嘅織物彈性及厚度都可以保持到，唔似BBQ網咁要特別設計塊鞋面。（當然以上呢堆只係例子，實際複雜更多）
❷ 污糟咗嘅Gripknit 係咪除咗外觀唔好睇之外，無影響？
當然唔係！Gripknit 因為以塗層加強摩擦，當呢種塗層太強力，好多泥/污糟嘅野就會依附上鞋面，長遠嚟講，即是代表越嚟越少 Gripknit 塗層可以真正接觸個波，性能會減退。好多人話，GripKnit 係易污糟姐，唔影響你落場，我地對呢樣野有少少保留！
❸ 點搞？
其實，呢種易污糟嘅特點反而係好事，其實就好似係通知緊你，你又要洗鞋啦…但同時，都見到唔少朋友反映啲污積已經因為 Gripknit 太強，污漬已經食咗落去個鞋面，無之前咁啜，好難洗…
呢種性能好，但同時好快打柴嘅特性，大家又點睇呢？？
