踢石地會傷關節大家都清楚，但香港最易接觸到嘅就係石地場。今集 Spotlight，我哋測試現時市面上常見石地足球鞋款嘅鞋底物料柔軟度以作為參考，幫大家揀到一對適合嘅石地足球鞋！
（小學生 Level 測試，只供參考）
──────測試小總結 （詳細見圖）
1. 最淋/最挺身？
Joma Top Flex Plus/Rebound 系列採用嘅 Reactive Ball 泡棉 (21ha) 跑贏其他鞋款成條街，而舊版 Mizuno Sala (未有Mizuno Enerzy標示)、Desporte 系列及 Nike Mercurial Academy 嘅鞋底物料都係比較硬身。淋係咪好，硬係咪差，下面再解釋！
2. 買貴版？
Mizuno 鞋款嘅頂級 Japan/Elite 同中高階 Pro 其實都係運用同一款 Mizuno Enerzy 物料，所以齋講緩震/回彈力係無分別。F50 就有唔同啦，Pro 高階版本 (35ha) 比 League 低階版本 (42ha) 更為柔軟。
3. 整體表現？
綜觀咁多個牌子，以 Joma 嘅鞋底物料最為柔軟，Athleta/New Balance/Adidas 等為中規中矩，而 Nike/Desporte/Mizuno 就偏硬身。
4. 特別設計元素？
拋開物料柔軟度，我哋見到以下幾對鞋係吸震/回彈上有幾特別嘅設定：
Joma Top Flex Plus: 泡棉物料非常吸震，但太軟嘅物料反而有機會成為敗筆，因為未必能夠提供足夠支撐，踩落地會較易拗柴。但係，Joma係鞋側加咗好少見嘅兩塊膠板，彌補整體穩定度嘅不足，希望可以兼顧柔軟度及穩定性，加上Joma鞋籠好闊嘅特性，Joma嘅足球鞋係非常適合大體形嘅波友！
Mizuno Enerzy: Mizuno Sala Pro/Elite/Japan 都有用到嘅 Mizuno Enerzy 物料係一種雙密度物料，姐係軟嘅位置同硬嘅位置都有，但可惜我地未有專業儀器解剖對鞋，解釋一下點解 Mizuno 會話呢種物料同時提供高緩震及高回彈。留意返，今年嘅 Mizuno 平底係做咗升級 (41ha)，舊版 (46ha) 係無 Mizuno Enerzy 架！
Nike Zoom Air: Mercurial 使用嘅 Zoom Air 技術，就好似鞋底有個加壓空氣單元，當你踩地時，佢哋會即刻彈起，令你隻腳向前推進，有一個好似彈簧嘅效果，而呢隻技術嘅耐用性會比 Lunarlon/Boost 等更高，唔係著得耐就淋晒咁樣。所以，會見到佢地嘅數值係比Nike其他鞋款較高。
──────有咩啟示？
較柔軟嘅鞋底材料一般有更強嘅吸震力，但其他因素，例如材料厚度、形狀等等都會對吸震力起到作用。相反，較硬嘅鞋底材料雖然踩落無咁舒服，但可較快/較有效作出回彈，方便加速/跑動。
較軟嘅鞋底物料適合以下波友：
。體型較大
。想減低整體肌肉/關節壓力
。日常/長時間使用
（但同時需考慮整體穩定性/鞋底高度 以免受傷！）
較硬嘅鞋底物料適合以下波友：
。體型較輕
。比賽/短時間使用—需要更強反應/回彈
。追求貼地感/赤足實在感
。想訓練腳板底肌肉
以上只係理論，每個人隻腳同踢波嘅需求都唔同，科學未能完整表達，所以著得開心著得舒服最重要！
