Bootmeister 一對唔合適場地嘅波砵唔單止影響你場上既表現，而且仲會大大縮短波砵嘅壽命，甚至令你好容易受傷。所以今次Bootmeister 會淺談各種場地同相對應既鞋底，令大家了解番波砵嘅基本之中既基本。
A. FG: Firm Ground (偏硬嘅草地)
FG波砵大多數以長膠釘為主，鞋釘數量一般有10 -14粒或以上，較AG的數量少但比起SG多。FG釘適用於較平整、偏硬、輕度濕潤而且草莖較長嘅天然草地，同時適用於鋪設得好或新淨嘅彷真草地。但係FG波砵係唔適合用於部分仿真草場，尤其係香港嗰啲疏於保養同草莖較短嘅場。因為FG釘比較長身，插入仿真草後容易啜實，當你急速轉向時，唔單止會扭傷，仲可能整爛對鞋。假如鞋底係 blade (刀釘)而唔係Conical (圓釘)，以上情況更容易出現。不過現代好多波砵已經設計成FG/AG共用，如Adidas Ace 17+ Purecontrol FG/AG。唔少既Nike FG釘亦都變晒做圓釘既設計，某程度上都係對香港波友既一個好處 (一砵踢晒真草人草)。
B. AG: Artificial Grass
AG全寫雖然叫Artificial Grass，直譯叫人造草，好易令人誤會係地毯草，但係實際上其實泛指仿真草！喺呢到我想譴責下好多人將人造草同仿真撈亂黎用！人造草 = 地毯草 (Turf)；仿真草 = 膠粒假草！全香港有近九成嘅仿真草場都依然係用緊第三代 (即有懷疑會致癌膠粒嘅仿真草)，只有少量嘅仿真草場用緊第四代 (草莖較長、毋須再使用橡膠粒作為填充物料承托草絲)，包括喇沙書院既人造草球場。AG波砵大多數以圓短膠釘為主，鞋釘數量較多，一般有13粒或以上。部分AG釘中間空心，好似冬甩咁，其實為左減輕多鞋釘帶來嘅重量外，仲會吸收與地面碰撞嘅衝擊。
C. SG: Soft Ground (鬆軟嘅草地)
俗稱「鋼釘」或「梯釘」，適用於濕潤及多泥嘅天然草地。SG波砵大多數以長身鋼釘為主，鋼釘嘅好處在於比起膠釘更耐用同唔易變形，而且仲可以更換鞋釘，所以多數職業球員都用選擇SG波砵。另外，SG波砵鞋釘數量為眾多鞋釘款中最少，一般只有6粒 (4粒前掌，2粒後掌)。然而，現代嘅SG波砵採用咗混合鞋釘(包含鋼釘及膠釘，而且超過6粒釘)，務求再一步提升抓地力。香港好多非職業嘅比賽都唔比著SG釘既砵，所以係香港係較為罕見。
D. HG: Hard Ground (堅硬嘅草地)
HG釘適用於草少而且堅硬嘅草地及。HG波砵大多數以短膠粗釘為主，排列較緊密，通常4粒一組咁排，而且鞋底通常會採用到比一般波砵較硬身嘅物料。呢啲設計目的係為咗將球員嘅體重平均分佈鞋底，令球員喺HG地踢波更加舒服。但係正因為HG波砵多鞋釘同用特別物料做鞋底，佢嘅重量比同款嘅FG/AG重好多。所以速度形嘅球員如果想買HG波砵，請先三思。另外，HG波砵專攻日韓市場，基本上香港唔會搵到，但係香港都有唔少球場適合HG釘架！(梗係啦，香港啲草場咁爛)
E. IC/ST/TR: Indoor Court (室內場地)
俗稱「平底」，適用在平面的水泥地或木板地上。IC波砵冇設有任何鞋釘，多數以膠底紋路代替。普遍係香港踢波既，自己都一定會買對IC黎著，因為係香港實在太多既石地場，唔似其他地區咁，踢波就一定係草場。以前既IC波砵大部份都係用生膠底，因為長期踢呢D地，波砵個底好快會磨爛。隨住足球風氣一路一路咁發展，依家既IC波砵亦都有好多既變化，有高筒波砵，有無鞋帶既波砵等等。而同時，最近ADIDAS就大推街頭足球呢個風氣，有唔少TANGO類既TR底波砵應運而生，除左踢得波之外，亦都可以出街用。其中大受歡迎嘅Boost 底 / Lunar 底將會係以後篇章詳細介紹
F. TF: Turf Trainer
俗稱 「碎釘」，適用於人造草(地毯草)。TF波砵有嘅唔係鞋釘，而係同鞋底融合嘅膠粒。因為喺草莖極短嘅人造草皮上，鞋釘根本穿透唔到，但平底鞋又會滑底，TF波砵正正填補咗兩者嘅缺點。可能TF係香港既普及性未算高，但其實TF係香港係可以著到的。某D地毯草，同埋係踢耐左無保養既仿真草，又未去到著到平底，但釘砵又插唔入D草，呢種地就應該著TF係最適合架啦。
今次係我地Bootmeister嘅一次小嘗試，希望大家睇完之後更加了解各種釘底嘅分別。特別想講嘅係AG釘，唔少客每次聽到AG釘就Say哂No，其實聽開仿真草的話，入番對AG釘砵都唔錯架。最後戴番個頭盔，如果以上內容有任何錯誤嘅地方，歡迎糾正～
